ایسا بھی زندگی میں آتا ہے اک زمانہ

ایسا بھی زندگی میں آتا ہے اک زمانہ
ہر چیز پر نگاہیں پڑتی ہیں عاشقانہ
باوصف خود پسندی یہ کربِ درد مندی
بیگانگی کے دعوے اور اس قدر یگانہ
تم بھی نہیں سمجھتے کتنے جمیل ہو تم
میری نظر سے پوچھو یہ رمزِ عاشقانہ
اللہ رے تیری عظمت، اے کافرِ محبت
اف رے تیرا زمانہ، اے حاصلِ زمانہ
تہذیبِ دیدہ و دل بے سوز جاں نہیں ہے
یا عقلِ والہانہ یا عشقِ والہانہ
یہ بھی خبر نہیں ہے گھائل ہوا ہوں کس سے
دل میں کھٹک رہا ہے اک تیرِِ بے نشانہ
عبرت سرائے دنیا، حیرت سرائے عقبیٰ
یہ بھی قمار خانہ، وہ بھی قمار خانہ

رئیس امروہوی