فراز تم نے عبث شوق سے سجائے سخن

فراز تم نے عبث شوق سے سجائے سخن

کہاں وہ قامتِ جاناں، کہاں قبائے سخن

بیان اس گُلِ رعنا کا بے قیاس نہ کر

کہ عندلیب کا دل چاہیے برائے سخن

کہ ذکرِ یار تو جان و جگر کا سودا ہے

کہ خونِ دل تو نہیں ہے فقط بہائے سخن

اسی کے دھیان سے روشن ہیں دل کی قندیلیں

اسی کی یاد سے منسوب ہر شعاعِ سخن

اسی کے دم سے ہیں سرسبز زخم عمروں کے

اسی کے دم سے صبا آشنا، فضائے سخن

اسی کے ہجر میں لکھے ہیں مرثیے دل کے

اسی کے وصل میں دیکھے ہیں عشوہ ہائے سخن

اسی کے قُرب سے گویا سکوتِ لالہ و گُل

اسی کے لطف سے لب بستگی، بجائے سخن

تم اپنے عجز کو سمجھتے ہوئے ہو اوجِ ہنر

سو اِس تضاد پہ غالبؔ کا یاد آئے سخن

"نہ شعلے میں وہ کرشمہ نہ برق میں وہ ادا"

تو کیا بیان سراپا ہو کیا بنائے سخن

"ز فرق تا بہ قدم ہر کجا کہ می نگرم"

نظر تو چیز ہے کیا ہے نہ تاب لائے سخن

وہ یاد آئے تو الہام بن کے شعر اترے

وہ بھول جائے تو پھر کس کو یاد آئے سخن

کبھی کبھی ہی دل و جاں سے آنچ اٹھتی ہے

فرازؔ! ہم نہیں کہتے سخن برائے سخن

احمد فراز