اب بھی کہنا ہے تو کہہ راج کماری مجھ کو

راج کماری

حضرتِ عشق درِ قیس تو دکھلائیں مجھے

ارمغانِ دلِ برباد لیے آئی ہوں

خواب کا شہر جلانا ہے اڑانی ہے راکھ

اس لیے آنکھ کو آباد لیے آئی ہوں

مجھ کو اس بستی سے بے دخل کیا لوگوں نے

جس کے در نہیں بنیاد لیے آئی ہوں

بھاگتے وقت میں اب تیری اسیری میں ہوں

خاک ملبوس پہنتی ہوں فقیری میں ہوں

تاجوری جب سے ملی کاسہ بدستوں کی مجھے

سب سمجھتے ہیں بڑی خوش ہوں امیری میں ہوں

جس کی آنکھوں میں چمکتے تھے سدا خواب مِرے

اب فقط رشتہ ہے اس شخص کی تصویر کے ساتھ

صورت دن جو دھڑکتا ہے مِرے پیش و پس

رقص کرتا ہے وہی رات کو زنجیر کے ساتھ

اشک جب سچے بہاؤں کبھی تو لگتا ہے

دل بھڑکتا ہے مِرا آنکھ سے خوں آتا ہے

دشت نے جب سے کیا تکیہ مِرے کمرے میں

پوچھنے حال مِرا خود ہی جنوں آتا ہے

تو زمانے کا طرفدار ہے جب تو گھر میرے

کون ہوں کیسی ہوں میں پوچھنے کیوں آتا ہے

جانتی ہوں کہ توازن نہیں آنکھوں میں تِری

جانتی ہوں کہ تجھے ہجر فسوں آتا ہے

میری تنہائِی کی حد سرحدِ افلاک تلک

میرا دکھ پھر بھی بھٹکتا ہے ابھی خاک تلک

کوئی تمثیل بنے گی نہ ہی کوئی تصویر

میری مٹی نے سفر کرنا ہے کب چاک تلک

وہ سمجھتا ہے مِری شان ہے شہزادی سی

وہ سمجھتا ہے مِرا کوئی محل تخت بھی ہے

وہ سمجھتا ہے مِرے پاس سواری ہے کوئی

وہ سمجھتا ہے سفر میرا نہیں رخت بھی ہے

زندگی کھینچتی ہے رنگ مِرے چہرے کا

سانس کی روزی بھی ملتی ہے ادھاری مجھ کو

آئینہ ہنستا ہے بے چہرگی پر دیکھ مری

اور کہتا ہے تو ہر روز ہی پیاری مجھ کو

میری خاطر نہ اڑا خاک تو معصوم سے شخص

ڈھونڈتا ہی رہے گا عمر تو ساری مجھ کو

بال بکھرے ہیں مِرے خون میں لت پت ہے وجود

اب بھی کہنا ہے تو کہہ راج کماری، مجھ کو

سعدیہ صفدر سعدی