میرا سورج

میرا سورج

مہتاب بدن والے تِرا لمس چرا لوں 

تو سُر ہے تو سنگیت ہے من میت ہے میرا

جگجیت ہے گلزار ہے تو پیار ہے میرا

سنگھار ہے بھگون ہے تو سرکار سجن اور 

دلدار ہے اوتار ہے میں داسی ہوں تیری

چرنوں میں پڑی تورے کرم تورے بھرم کی 

محتاج مِرا دین تو ایمان عقیدہ 

تجھ سے ہے تِری خاک بھروں مانگ میں اپنی

نظموں کی سلامی سے کروں تیرا سراپا 

تسخیر بنے میرے لیے رنگ جدا سا

سجدوں سے تجھے رام کروں تو ہے خدا سا

غزلوں کی دھنک دھوپ تِرے چہرے پہ چھڑکوں 

روتے ہوئے کھینچوں میں خطِ ہجر زمیں پر

ہنستے ہوئے تجھ کو میں مناؤں تجھے جھڑکوں 

البیلا ہے معصوم ہے نادان ہے پگلا

بچوں کی طرح ضدی ہے سمجھاؤں تجھے کیا 

آدابِ محبت کا نہیں تجھ کو پتا کیا؟

کیوں روز بچھڑنے کی اداکاری کرے ہے 

جب تجھ کو خبر ہے کہ تِری ذات مکمل 

ہو سکتی نہیں میرے بنا جاتا ہی کیوں ہے

سب دیکھ لیا تم نے منافق ہیں یہاں سب 

چاہا ہے مِری طرح کسی نے بھی تجھے کب 

میں کچھ بھی نہیں خاک اڑاتی ہوں تِرے بعد

جو نقش نہیں بنتے بناتی ہوں تِرے بعد 

گاؤں میں نومبر نے قدم رکھے ہیں آ جا 

پلکوں پہ مِری سرد چراغاں ہے تو نہ جا

مانگا ہے تجھے میں نے نمازوں میں ہمیشہ

تو عجز مِرا، صبر مِرا، میری دعا ہے 

میں خود سے تجھے کیسے مٹاؤں مجھے بتلا 

اے شخص تو ہاتھوں پہ نہیں دل پہ لکھا ہے

سعدیہ صفدر سعدی