مجھے تو شور قیامت دلوں میں ملتا ہے

 مجھے تو شورِ قیامت دلوں میں مِلتا ہے

سکونِ قلب کہاں جنگلوں میں ملتا ہے

وہ مجھ سے دور اگر ہے تو کیا ہوا آخر

وہ میرے دھیان، مِری دھڑکنوں میں ملتا ہے

خوشی کے دن بھی گزارے مگر نہ ہاتھ آیا

وہ اک سرور جو مجھ کو دکھوں میں ملتا ہے

اسی لیے تو میں لوگوں سے دور رہتا ہوں

کہ قربتوں کا مزا فاصلوں میں ملتا ہے

میں صحنِ باغ میں کیسے رہوں شجر کی طرح

عجیب زہر مجھے موسموں میں ملتا ہے

تم آج دل کے خرابوں میں ڈھونڈتے کیا ہو

خزانہ کیا کوئی ویراں گھروں میں ملتا ہے

زمان کنجاہی