راستے میں ٹھکانہ پڑتا ہے

راستے میں ٹھکانہ پڑتا ہے

 اِس لیے جانا آنا پڑتا ہے

 آگ دل میں بھڑک رہی ہو اگر

 آنسوؤں سے بُجھانا پڑتا ہے

 خواب کتنا بھی دلفریب سہی

 خواب کو بھُول جانا پڑتا ہے

ہم بھی تو گُلستاں کے باسی ہیں

باغباں کو بتانا پڑتا ہے

 تُم سے ملنے کا شوق اپنی جگہ

 درمیاں اک زمانہ پڑتا ہے

 درد کہہ دے جو میرے ساتھ چلو

 دور تک ساتھ جانا پڑتا ہے

 ہاتھ جل جائیں کہ جلے دامن

 اپنے گھر کو بچانا پڑتا ہے

 جن کو کعبے سے بیر ہو، اُنکو

 بُت کدے کو سجانا پڑتا ہے

 ہجر سے جان کس طرح چُھوٹے؟

 بوجھ اپنا اُٹھانا پڑتا ہے

 کام رانجھے سے جب نہیں ہوتا

ہیر کو گھر بسانا پڑتا ہے

 وہ خدا ہےتو اُسکی چوکھٹ پر

 اپنے سر کو جھُکانا پڑتا ہے

 کون کھوٹا ہے اور کون کھرّا

 آخرش آزمانا پڑتا ہے

 یہ جہاں ہو کہ وہ جہاں ہو بتولؔ

ساتھ سب کا نبھانا پڑتا ہے

فاخرہ بتول