دیر لگی آنے میں تم کو شکر ہے پھر بھی آئے تو

دیر لگی آنے میں تم کو شُکر ہے پھر بھی آئے تو
 آس نے دل کا ساتھ نہ چھوڑا ویسے ہم گھبرائے تو
شفق دھنک مہتاب گھٹائیں تارے نغمے بجلی پھول
 اس دامن میں کیا کیا کچھ ہے دامن ہاتھ میں آئے تو
چاہت کے بدلے میں ہم نے بیچ دی اپنی مرضی تک
کوئی ملے تو دل کا گاہک کوئی ہمیں اپنائے تو
کیوں یہ مہر انگیز تبسم مد نظر جب کچھ بھی نہیں
 ہائے کوئی انجان اگر اس دھوکے میں آ جائے تو
نادانی اور مجبوری میں یارو کچھ تو فرق کرو
 اک بے بس انسان کرے کیا ٹوٹ کے دل آ جائے تو 

عندلیب شادانی