کوئی تارا کوئی شب تاب کہاں سے لائیں

کوئی تارا، کوئی شب تاب کہاں سے لائیں 

 شبِ سُرخاب میں سُرخاب کہاں سے لائیں

 گہرے پانی کی طرح خود میں بھرے رہتے ہیں 

 ساحلوں کے لیے پایاب کہاں سے لائیں 

ہم کو آتا نہیں ہر حال میں چلتے رہنا 

 اے زمانے! ترے آداب کہاں سے لائیں 

 حالتِ دید میں دیکھیں بھی تو کیا کیا دیکھیں 

 پاس آنکھیں ہی نہیں، خواب کہاں سے لائیں 

 ہم زمیں پوش ہیں، مٹی پہ پڑے رہتے ہیں 

 ہم پرندوں کے لیے قاب کہاں سے لائیں 

 جل پری! ہم تو ہیں خود خاک سرِ چاک ابھی

 ہم ترے واسطے ظرفاب کہاں سے لائیں 

 ہم مہاجر ہیں سرِ شہرِ محبت ناصرؔ

 ہم طرب خیزی کے اسباب کہاں سے لائیں 

نصیر احمد ناصر