دیکھ تو دل کہ جاں سے اٹھتا ہے

ديکھ تو دل کہ جاں سے اٹھتا ہے

يہ دھواں سا کہاں سے اٹھتا ہے 

گور کس دل جلے کی ہے يہ فلک 

شعلہ اک صبح ياں سے اٹھتا ہے 

خانۂ دل سے زينہار نہ جا 

کوئی ايسے مکاں سے اٹھتا ہے 

نالہ سر کھينچتا ہے جب ميرا 

شور اک آسماں سے اٹھتا ہے 

لڑتی ہے اس کی چشمِ شوخ جہاں 

ايک آشوب واں سے اٹھتا ہے 

سُدھ لے گھر کی بھی شعلۂ آواز 

دُود کچھ آشياں سے اٹھتا ہے 

بيٹھنے کون دے ہے پھر اس کو 

جو تيرے آستاں سے اٹھتا ہے 

يوں اٹھے آہ اس گلی سے ہم 

جيسے کوئی جہاں سے اٹھتا ہے 

عشق اک ميرؔ بھاری پتھر ہے 

بوجھ کب ناتواں سے اٹھتا ہے

میر تقی میر