موسم کرب انتظار بھی جھوٹ

موسمِ کربِ انتظار بھی جھوٹ

دل نہ مانے تو وصلِ یار بھی جھوٹ

موت، تیری طلب بھی لغزشِ لب

زندگی ، تیرا اعتبار بھی جھوٹ

وسعتِ داستانِ شوق غلط

کوششِ حرفِ اختصار بھی جھوٹ

خلقتِ شہر مصلحت پیشہ

ورنہ فرمانِ شہریار بھی جھوٹ

جھوٹ ہے سب خزاں کا خمیازہ

عکسِ رنگِ رخِ بہار بھی جھوٹ

نارسائی کو راستے مشکل

کور چشمی کو کوہسار بھی جھوٹ

دور سے پیاس کو سراب چناب

اہلِ صحرا کو آبشار بھی جھوٹ

دسترس کا طلسم ہے ورنہ

ساعتِ جبر واختیار بھی جھوٹ

پیرہن خونِ دل میں تر کر لو

ورنہ دامانِ تار تار بھی جھوٹ

صرف اس کا سفر ہے سچ محسن

میری رہ بھی مِرا غبار بھی جھوٹ

محسن نقوی