راجا ہے کوئی اس میں نہ رانی ہے مرے دوست

راجا ہے کوئی اس میں نہ رانی ہے مِرے دوست
اپنی تو کوئی اور کہانی ہے مرے دوست
تم ساتھ ہو میرے تو کہا میں نے ہے، ورنہ
کب شام یہ اتنی بھی سہانی ہے مرے دوست
میں سامنے تیرے ہوں اِدھر دیکھ تُو مجھ کو
تصویر تو البم میں پرانی ہے مرے دوست
ہونا ہے بہ اندازِ غزل تجھ سے مخاطب
کہنی، نہ کوئی بات چھپانی ہے مرے دوست
اِس صحن سے اُس صحن چلی جاتی ہیں اڑ کر
اتنی سی تو چڑیوں کی کہانی ہے مرے دوست
بہتے ہیں اگر اشک، تو بہنے دے انہیں تُو
پانی ہی تو جینے کی نشانی ہے مرے دوست

زکریا شاذ