چل رہا تھا کئی زنجیروں سے وابستہ میں

چل رہا تھا کئی زنجیروں سے وابستہ میں
چھوڑ آیا ہوں تِری چاہ میں ہر رستہ میں
کر دیا عشق نے مستانۂ پرواز مجھے
اُڑ رہا ہوں تِرے اطراف میں پر بستہ میں
گُل بھی اظہارِ محبت کے لیے کم نکلے
چار شعروں کا اٹھا لایا ہوں گُلدستہ میں
اک طرف مسند و ایوان تِرے سامنے ہیں
اک طرف میں ہوں، تہی دامن و دل بستہ میں
اب سمجھ آئے پرندوں کے مصائب مجھ کو
کٹ رہا ہے وہ شجر جس سے ہوں وابستہ میں
موسمِ گُل نے ذرا زخم سنوارے تو سعیدؔ
پھر نکل آیا محبت پہ کمر بستہ میں

سعید خان