محمل ہے مطلوب نہ لیلیٰ مانگتا ہے

محمل ہے مطلوب نہ لیلیٰ مانگتا ہے
چاک گریباں قیس تو صحرا مانگتا ہے
ہجر، سرِ ویرانۂ جاں بھی مُہر بلب
وصل، گلی کوچوں میں چرچا مانگتا ہے
اس آئینہ خانے کا ہر رقص کناں
اپنے سامنے اپنا تماشا مانگتا ہے
ناامیدی لاکھ قفس ایجاد کرے
طائرِ دل پروازِ تمنا مانگتا ہے
عمر بتاتا ہے امروز میں اور مکیں
دروازے پر دستکِ فردا مانگتا ہے
دھوپ جوانی کا یارانہ اپنی جگہ
تھک جاتا ہے جسم، تو سایہ مانگتا ہے
باندھ سگِ آوارہ چوکھٹ کے اندر
ایک مسافر تجھ سے رستہ مانگتا ہے
لوگ طوالت سے گھبراتے ہیں، ورنہ
ایک زمانہ سیدھا رستہ مانگتا ہے

اعجاز گل