حیراں ہوں کیوں دیر پشیماں سا لگے ہے

حیراں ہوں کیوں دیر پشیماں سا لگے ہے
سایہ جو مِرے قد سے گریزاں سا لگے ہے
اک وحشتِ جاں ہے کبھی صحرا کبھی زنداں
اک عالمِ دل ہے کہ بہاراں سا لگے ہے
پندار نے ہر بار نیا دِیپ🪔 جلایا
جو چوٹ بھی کھائی ہے وہ احساں سا لگے ہے
کچھ سوچ کے کہنا کہ ہمیں حرفِ تسلی
تازہ ہو اگر زخم تو پیکاں سا لگے ہے
کیا آس تھی دل کو کہ ابھی تک نہیں ٹوٹی
جھونکا بھی ہوا کا ہمیں مہماں سا لگے ہے
آنچل کا جو تھا رنگ وہ پلکوں پہ رچا ہے
اب کوئی بھی موسم ہو گل افشاں سا لگے ہے
خوشبو کا یہ اندازہ بہاروں میں نہیں تھا
پردے میں صبا کے کوئی ارماں سا لگے ہے
سونپی گئی ہر دولتِ بیدار اسی کو
یہ دل جو ہمیں آج بھی ناداں سا لگے ہے
تجھ کو بھی اداؔ! جرأتِ گفتار ملی تھی
تُو بھی مجھے اک حرفِ پریشاں سا لگے ہے

ادا جعفری