اندھیری رہ میں مسافر کہیں نہ بھٹکا تھا

اندھیری رہ میں مسافر کہیں نہ بھٹکا تھا
کسی منڈیر پہ جب تک چراغ جلتا تھا
وہ کتنی دور رہا، فیصلہ بھی اس کا تھا
مجھے تو قرب کے احساس نے سنبھالا تھا
یہی غبارِ شب و روز کا کمال بھی ہے
جو آنکھ دیکھ نہ پائی وہ دل نے دیکھا تھا
سفر تمام ہوا اور حیرتیں نہ گئیں
جو قربتیں تھیں وہاں فاصلہ بلا کا تھا
نہ جانے لوگ کہاں تھے، زمانہ تھا کہ نہیں
زمیں پہ میں تھی فلک پر بس اک ستارا تھا
یہی خطا کہ پجارن تھی اور نہ دیوی تھی
بڑی خطا تھی کہ خود کو بھی میں نے چاہا تھا
جو اذن ہو تو میں کچھ دیر اپنے پاس رہوں
کہا نہیں تھا یہ، بس یوں ہی دل نے سوچا تھا
نہ آستاں نہ کوئی بام و در ہی جی کو لگے
چلن سدا سے یہی سر پھری ہوا کا تھا

ادا جعفری