مطلوب زندگی کو ابھی امتحاں نہیں

مطلوب زندگی کو ابھی امتحاں نہیں
اب تک متاعِ درد سے دل بدگماں نہیں
جو برگِ خشک تند ہواؤں کی زد پہ تھا
وہ آشنائے راز کہاں ہے، کہاں نہیں
دیکھو تو ہر جبِیں پہ ہے اک آشنا سی لَو
سوچو تو آس پاس کوئی رازداں نہیں
چہروں کا رنگ دیکھ، نگاہوں کی بات سن
وہ بے زباں نہیں جو ترے ہم زباں نہیں
ہر لمحہ اک صدی سا گزارا ہے کرب نے
دل کو ندامتِ نفسِ رائیگاں نہیں
اک دوسرے کا حال، چلو ہم ہی پوچھ لیں
شب کا سفر طویل ہے، افسانہ خواں نہیں
دیوارِ شب وہی ہے، جمالِ سحر وہی
شیشے نہیں رہے ہیں کہ سنگِ گراں نہیں
گزرے ہزار قافلے جس راہ سے اداؔ
اس راستے میں ایک بھی سنگِ نشاں نہیں

ادا جعفری