توڑیے توبہ کو کیجے بادہ خواری ان دنوں

توڑئیے توبہ کو، کیجے بادہ خواری ان دنوں

موسمِ گل ہے، کہاں پرہیزگاری ان دنوں

تیغِ ابرو سے ہے شوقِ زخم کاری ان دنوں

نیم بسمل کی طرح ہے بے قراری ان دنوں

جاں بلب رکھتا ہے اک رشکِ مسیحا کا فراق

دم نکل جاوے یہ حالت ہے ہماری ان دنوں

شوقِ آرائش ہے اس جانِ جہاں کو آج کل

لپٹی رہتی ہے دامن سے کناری ان دنوں

لو لگی ہے تیغِ قاتل سے شہادت کا ہے شوق

خون ہے زخموں کی طرح آنکھوں سے جاری ان دنوں

فصلِ گل ہے یاد آتی ہے مجھے رفتارِ یار

چلتی ہے بن بن کے کیا بادِ بہاری ان دنوں

سامنا رہتا ہے اشکِ سرخ و رنگِ زرد کا

آشنائی درد سے ہے، غم سے یاری ان دنوں

دوستدار اس کا جو مجھ سا اٹھ گیا دنیا سے ہے

بے کسی پھرتی ہے کیسی ماری ماری ان دنوں

یار آزدہ ہے آتشؔ، آسمان ہے برخلاف 

کون سنتا ہے ہماری آہ و زاری ان دنوں

خواجہ حیدر علی آتش