یہ آرزو ہے کہ لفظوں کو آئینہ کر دوں

نعتِ رسولِ مقبولؐ

یہ آرزو ہے کہ لفظوں کو آئینہ کر دوں
قدیم یاد کے مضمون کو نیا کر دوں
بنے بنائے قرینوں میں نعت کیوں لکھوں
میں کیوں نہ کوئی قرینہ نیا بنا کر دوں
میرے قصیدے کی تشبیب بھی ہو ثابت سی
کڑی کڑی سے ملا لوں تو سلسلہ کردوں
دِیے بنا کے منڈیروں پر اس کے اسم رکھوں
میں اس کے نام کا ہر حرف قمقمہ کر دوں
وہ چاندنی کا پیمبر! کہ اس کو سوچوں تو
اندھیری رات کے چہرے کو دودھیا کر دوں
وہ نامور تھا، مگر عاجزی سے ملتا تھا
میں اک جواب تو لوگوں کو سر جھکا کر دوں
وہ سرخرو تھا، پہ راتوں کو اٹھ کے روتا تھا
میں اس کے نام پہ اک شب تو رت جگا کردوں
لہو میں ڈوب کے بھی وہ دعائیں دیتا تھا
کبھی تو میں بھی عدو کے لیے دعا کر دوں
میں افتخارؔ مغل اس کا نادہندہ ہوں
ہنر کے باب میں یہ قرض بھی ادا کر دوں

افتخار مغل