جو سیلِ درد اٹھا تھا وہ جان چھوڑ گیا​

جو سیلِ درد اٹھا تھا، وہ جان چھوڑ گیا​
مگر وہ جسم پہ اپنا نشان چھوڑ گیا​
ہر ایک چیز میں خوشبو ہے اسکے ہونے کی
عجب نشانیاں وہ مِرا میہمان چھوڑ گیا
ذرا سی دیر کو بیٹھا، جھکا گیا شاخیں​
پرندہ پیڑ میں اپنی تھکان چھوڑ گیا​
سمٹتی پھیلتی تہنائی، سوتے جاگتے درد
وہ اپنے اور مِرے درمیان چھوڑ گیا
بہت عزیز تھی نیند اس کو صبحِ کاذب کی​
سو اس کو سوتے ہوئے کاروان چھوڑ گیا​
رہا ریاض اندھیروں میں نوحہ کرنے کو​
وہ آنکھیں نوچنے والا زبان چھوڑ گیا​

​

ریاض مجید​