آخر کو ترا درد سے یارانہ ہوا نا

آخر کو تِرا درد سے یارانہ ہوا نا
تُو اُن کی عنایات سے بے گانہ ہوا نا
ویسے تو بہت بانٹتا پھِرتا ہوں محبت
دل کھول کے دیتا نہیں، دریا نہ ہوا نا
ملتی ہے شراب اور، شباب اور، کباب اور
جنت نہ ہوئی آپ کی، مے خانہ ہوا نا
مٹی میں چھپا لیتی ہے اشکوں کے نگینے
یہ تیری زمیں عرش کا تہ خانہ ہوا نا
کہتے ہیں وہاں کوئی بھی آباد نہیں ہے
پھر عالمِ لاھوت بھی وِیرانہ ہوا نا
دو دِن بھی مِرے دِل میں ٹھکانہ نہیں کرتا
اُس کا یہ وتیرہ تو فقیرانہ ہوا نا
ہرسال مِری برسی مناتے ہیں مِرے لوگ
اعلان مِری موت کا سالانہ ہوا نا
جب عقل مِری خود مِرے بس میں نہیں رہتی
ثابت ہوا کہ میں تِرا دیوانہ ہوا نا
اچھا ہے کہ توڑا گیا مُرجھایا نہیں تھا
ٹُوٹا تو میرے یار کو نذرانہ ہوا نا
ہرسال میں بُھگتائے ہیں غم تین سو پیسنٹھ
یوں ایک سِتم ہم پہ تو روزانہ ہوا نا
سنتے ہیں کہ مر کر بھی ہے جینے کی مشقت
ایسا ہے تو مرنا کوئی مرنا نہ ہوا نا

ادریس آزاد