عشق میں جذب کیا اثر بھی نہیں

عشق میں جذب کیا اثر بھی نہیں

مر مِٹے ہم انہیں خبر بھی نہیں

نہ ملے گر ملا نہ سرمۂ طور

کیا تِری خاکِ رہگزر بھی نہیں

سخت یوں ہی تھی منزلِ غمِ عشق

پھر کوئی دل کا ہمسفر بھی نہیں

چل چکا آپ کا فریبِ وفا

اب میں اس درجہ بے خبر بھی نہیں

ہم کو اب شوقِ مے کہاں لیکن

مفت مل جائے تو حذر بھی نہیں

بے دلی میں فغانِ شام تو کیا

صورتِ گریۂ سحر بھی نہیں

بادہ نوشی میں سچ تو ہے حسرتؔ

نفع شاید نہ ہو، ضرر بھی نہیں

حسرت موہانی