کہتا ہوں عقلمند مگر سر پھرا ہوں میں

کہتا ہوں عقلمند مگر سر پھرا ہوں میں

میں عمر بھر یہی نہیں سمجھا کہ کیا ہوں میں

دعویٰ میں کیسے کر دوں کوئی پارسا ہوں میں

سچ  تو یہ ہے، برا نہیں سب سے برا ہوں میں

نکلا تھا برسوں پہلے کسی کی تلاش میں

چسپاں ہیں اشتہار یہ اب گمشدہ ہوں میں

حاکم یہ کہتا پھِرتا ہے سنتا ہے وہ مِری

"میں لاکھ چیختا رہوں  "بے آسرا  ہوں میں

منصف نے جانے کس کی سنی دل کی چھوڑ کر

دل اس کا چیختا رہا کہ بے خطا ہوں میں

احباب بھی، عزیز بھی، شامل ہیں بھیڑ میں

حملہ ہر اک طرف سے ہے، تنہا کھڑا ہوں میں

انسان کا یہ حال کہ ہے شرک پر مُصر

"کہتا ہے بار بار خدا کہ "خدا ہوں میں"

رہتی ہے دشمنوں کی ہدایت کی آرزو

جاویدؔ انتقام سے ناآشنا ہوں میں

جاوید جمیل