اب صبا کوچہ جاناں میں گزر ہے کہ نہیں​

خبر ہے کہ نہیں​

اب صبا کوچۂ جاناں میں گزر ہے کہ نہیں​

تجھ کو اس فتنۂ عالم کی خبر ہے کہ نہیں​

بجھ گیا مہر کا فانوس، کہ روشن ہے ابھی​

اب ان آنکھوں میں لگاوٹ کا اثر ہے کہ نہیں​

اب مِرے نام کا پڑھتا ہے وظیفہ کوئی​

اب مِرا ذکرِ وفا وِردِ سحر ہے کہ نہیں​

اب بھی تکتی ہیں مِری راہ وہ کافر آنکھیں​

اب بھی دُزدیدہ نظر جانبِ در ہے کہ نہیں​

چھپ کے راتوں کو مِری یاد میں روتا ہے کوئی​

موجزن آنکھ میں اب خونِ جگر ہے کہ نہیں​

حسن کو پُرسشِ بیمار کا ہے اب بھی خیال​

مہر کی ذرۂ خاکی پہ نظر ہے کہ نہیں​

بے خبر مجھ کو زمانے سے کِیا ہے جس نے​

کچھ اسے میری تباہی کی خبر ہے کہ نہیں​

کھائے جاتا ہے مجھے درد غریب الوطنی​

دل پر اس جانِ وطن کے بھی اثر ہے کہ نہیں​

جوشؔ خاموش بھی ہو پوچھ رہا ہے کیا کیا​

کچھ تجھے تاڑنے والوں کی خبر ہے کہ نہیں​

​

جوش ملیح آبادی