آج کی رات
دیدنی ہے مِری محفل کا سماں آج کی رات
موج صہبا میں ہے رقصِ دو جہاں آج کی رات
تل گیا ہے کوئی اس طرح گل افشانی پر
ذرے ذرے پہ ہے جنت کا گماں آج کی رات
قابلِ دید ہے بکھرے ہوئے پھولوں کی بہار
ایک موہوم سا نقطہ ہے جہاں ارض و سما
ایسا اک دائرہ ہے رطلِ گراں آج کی رات
اثر مے سے ہے پگھلا ہوا سونا گویا
عرق آلودہ رخِ سیمبراں آج کی رات
پرتوِ بادۂ روشن سے ہے بے گرد و غبار
افقِ عربدۂ زہرہ وشاں آج کی رات
قابلِ (ظلم) نظم نہیں فطرت خوباں اس وقت
قادرِ جور نہیں طبع بتاں آج کی رات
شمع ہے قابل پروانۂ آشفتہ مزاج
حسن ہے مائلِ صاحب نظراں آج کی رات
آبِ حیواں کا نہ کر ذکر کہ حاصل ہے مجھے
دولتِ قربِ مسیحا نفساں آج کی رات
جوئے کہسار کے مانند گزر عالم سے
یہ ہے فرمانِ جہانِ گزراں آج کی رات
اف ری ساحل پہ غزلہائے رواں کے ہلچل
اک تلاطم ہے سرِ آبِ رواں آج کی رات
غلغلہ ساز کا ہے، دیر مغاں سے لے کر
تا بہ خلوت گہہِ حورانِ جناں آج کی رات
جیسے بھیگی ہوئی زلفوں کی مہک عود آمیز
نفس شام ہے یوں مشک فشاں آج کی رات
خادمانِ درِ ساقی کے سروں پر کج ہے
کلہِ خواجگئ کون و مکاں آج کی رات
حلقہ باندھے ہوئے میخوار ہیں سرگرمِ طواف
جوشؔ ہے قبلۂ رندانِ جہاں آج کی رات
جوشؔ ملیح آبادی
No comments:
Post a Comment