غم منزل نہ رہا ہو جیسے

غمِ منزل نہ رہا ہو جیسے

قافلہ ٹھہر گیا ہو جیسے

اس طرح بھولتے جاتے ہیں تجھے

سلسلہ ٹوٹ گیا ہو جیسے

دل سے آواز تو آتی ہے، مگر

کوئی درماندہ صدا ہو جیسے

بہکا بہکا سا ہے اندازِ خیال 

یاد کچھ بھی نہ رہا ہو جیسے

اب تو منزل ہی نہیں ہے کوئی

گھر کہیں چھوٹ گیا ہو جیسے

دل کے سنبھلے ہوئے انداز میں بھی

بہکی بہکی سی ادا ہو جیسے

صبح ہوتے ہیں سنبھل جاتے ہیں

رات کو دل نہ دُکھا ہو جیسے

فرید جاوید