اے شخص اگر جوش کو ڈھونڈنا چاہے

پروگرام

اے شخص اگر جوش کو تُو ڈھونڈنا چاہے​

وہ پچھلے پہر حلقۂ عرفاں میں ملے گا​

اور صبح کو وہ ناظرِ نظارۂ قدرت​

طرفِ چمن و صحنِ بیاباں میں ملے گا​

اور دن کو وہ سرگشتۂ اسرار و معانی​

شہرِ ہنر و کوئے ادیباں میں ملے گا​

اور شام کو وہ مردِ خدا، رندِ خرابات​

رحمت کدۂ بادہ فروشاں میں ملے گا​

اور رات کو وہ خلوتئ کاکل و رخسار​

بزمِ طرب و کوچۂ خوباں میں ملے گا​

اور ہو گا کوئی جبر، تو وہ بندۂ مجبور​

مُردے کی طرح کلبۂ احزاں میں ملے گا​

​

جوش ملیح آبادی