زمان ہجر مٹے دورِ وصل یار آئے

زمانِ ہجر مِٹے، دورِ وصلِ یار آئے

الہٰی اب تو خزاں جائے اور بہار آئے

ستم ظریفئ فطرت، یہ کیا معُمہ ہے

کہ جس کلی کو بھی سونگھوں میں، بوئے یار آئے

چمن کی ہر کلی، آمادۂ تبسم ہے

بہار بن کے مِری جانِ نو بہار آئے

ہیں تشنہ کام ہم، ان بادلوں سے پوچھے کوئی

کہاں بہار کی پریوں کے تخت اتار آئے

کسی کا شکوہ عبث، یہ دعائیں مانگ اے دل

کہ اب ملیں تو ہمیں اس قدر نہ پیار آئے

تِرے خیال کی بے تابیاں، معاذ اللہ

کہ ایک بار بھلائیں تو لاکھ بار آئے

گھٹا وہ اٹھی ہے پھر بمبئی کے ساحل سے

کہ مجھ تلک اگر آئے تو مشکبار آئے

وہ آئیں یوں مِرے آغوشِ عشق میں اخترؔ

کہ جیسے آنکھوں میں اک خوابِ بیقرار آئے

اخترؔ شیرانی