مِلنے کی ہر آس کے پیچھے ان دیکھی مجبوری تھی
راہ میں دشت نہیں پڑتا تھا چار گھروں کی دوری تھی
آنکھوں کی تکمیل ہوئی یا خوابوں کی بے نوری تھی
رنگوں کی جھنکار کے پیچھے ہر تصویر ادھوری تھی
جذبوں کا دَم گھٹنے لگا ہے لفظوں کے انبار کے پیچھے
تیری شکل کے ایک ستارے نے پَل بھر سرگوشی کی
شاید ماہ و سالِ وفا کی اتنی سی مزدوری تھی
شاخِ گماں کے افسانوں سے ناحق پھول ملول ہوا
صحنِ چمن تک خوشبو کی ہر لغزِش غیر شعوری تھی
پیار گیا تو کیسے مِلتے رنگ سے رنگ اور خواب سے خواب
ایک مکمل گھر کے اندر ہر تصویر ادھوری تھی
ایک غزال کو دور سے دیکھا اور غزل تیار ہوئی
سہمے سہمے سے لفظوں میں ہلکی سی کستوری تھی
غلام محمد قاصر
No comments:
Post a Comment