نظام قہر مسلسل کہاں نہیں ساقی

حیاتِ بے اماں

نظامِ قہرِ مسلسل کہاں نہیں ساقی

زمیں پہ نوعِ بشر کو اماں نہیں ساقی

خدا گواہ کہ ہر نوشِ سود کا مرہم

بجر جراحتِ نیشِ زیاں نہیں ساقی

وہ کون جشنِ دف و چنگ و عود ہے ایسا

جو پیش خیمۂ آہ و فغاں نہیں ساقی

وہ کون غم ہے کہ محدود کہہ سکیں جس کو

وہ کون درد ہے جو بے کراں نہیں ساقی

وہ کون صبحِ بہاراں کی ہے کرن ایسی

جو ضربِ ناوک و نوکِ سناں نہیں ساقی

وہ کون فرد ہے جو ہر نفس بفضلِ خدا

دہانِ گور کی جانب دواں نہیں ساقی

بزیرِ خیمۂ درمانِ حضراتِ حق بھی

علاجِ دردِ صعبت کشاں نہیں ساقی

زمین پر ہے وہ شرِ کثیر لا محدود

کہ جنسِ خیر کا نام و نشاں نہیں ساقی 

باُستوارئ فرمودۂ خدائے بزرگ

بشر کو جورِ عدو سے اماں نہیں ساقی

ہزار حیف کہ ہم ناریوں کے عالم میں

کہیں تصرفِ نورانیاں نہیں ساقی

فرشتے، دیوتا، اوتار، اہرمن، یزداں

اس آدمی پہ کوئی مہرباں نہیں ساقی

جو پوچھیے بھی تو کس سے رموزِ پست و بلند

دہانِ ارض و سما میں زباں نہیں ساقی

جہاں جبینِ اِمامانِ فکر جھک جائے

کہیں زمیں پہ وہ آستاں نہیں ساقی

اب اس دیارِ سرورِ دوام میں لے چل

جہاں ضرورتِ فیضِ مغاں نہیں ساقی

اب اس جہاں کی طلب ہے بحکمِ عزتِ نفس

جہاں ملازمتِ آب و ناں نہیں ساقی

اب اس خموشئ اہلِ خبر کا طالب ہوں

جو رہگزارِ چنین و چناں نہیں ساقی

اب اشتیاق ہے اس کوئے بے نیازی کا

جہاں تصورِ سود و زیاں نہیں ساقی

اس مقامِ تجرد کی آرزو ہے مجھے

جہاں مقاربتِ چشم و جاں نہیں ساقی

اب اس مدینۂ اطلاق کی تمنا ہے

جہاں وجودِ زمان و مکاں نہیں ساقی

تمام دہر کو تج کر ملے خود آگاہی

جو پٹ سکے تو یہ سودا گراں نہیں ساقی

جوشؔ ملیح آبادی