ناگہ چمن میں جب وہ گل اندام آ گیا

ناگہ چمن میں جب وہ گل اندام آ گیا 

گل کو شکستِ رنگ کا پیغام آ گیا 

اٹھا جو صبحِ خواب سے وہ مست پرخمار 

خورشید کف کے بیچ لیے جام آ گیا

سوچے تھا اہلِ جرم سے کس کو کروں میں قتل 

اتنے میں اس کو یاد مِرا نام آ گیا 

افسوس ہے کہ ہم تو رہے مست خواب صبح 

اور آفتاب عمر لب بام آ گیا 

سمجھو خدا کے واسطے پیارے برا نہیں

دو دن اگر کسی کے کوئی کام آ گیا

کر قطع کب گیا تِرے کوچے سے مصحفیؔ 

گر صبح کو گیا، وہیں پھر شام آ گیا

غلام ہمدانی مصحفی