باہر سے نہیں ٹوٹ کے اندر سے گرا ہوں

باہر سے نہیں ٹوٹ کے اندر سے گِرا ہوں
اس بار میں اک دستِ ہنرور سے گرا ہوں
ان نظروں سے گرنے کا سبب تو نہیں معلوم
بس اتنا پتہ ہے بہت "اوپر" سے گرا ہوں
رکھ لے گا مری خاک نمائش کے لیے وہ
میں جلتا ہوا رات کے منظر سے گرا ہوں
تُو دھو نہیں پائے گا مجھے اشک بہا کر
دامن پہ ترے تیرے ہی خنجر سے گرا ہوں
اک بار بھی مانا نہیں وہ زود فراموش
میں کہتا رہا تیرے برابر سے گرا ہوں
میں اف بھی کروں گا تو چٹخ جائے گا سارا
شیشے سے بنے شخص کی ٹھوکر سے گرا ہوں
اظہر مرے دشمن کو خبر ہو کہ میں اب بھی
تیروں سے نہیں اپنے مقدر سے گرا ہوں

اظہر ادیب