مرا ہر لفظ بے توقیر رہنے کے لئے ہے

مِرا ہر لفظ بے توقیر رہنے کے لیے ہے
مِرا ہر خوف دامن گیر رہنے کے لیے ہے
میں جس شہرِ جمال آثار کا مارا ہوا ہوں
وہ سارا شہر بے تعمیر رہنے کے لیے ہے
میں ایسے خواب کی پاداش میں معتوب ٹھہرا
جو ساری عمر بے تعبیر رہنے کے لیے ہے
ذرا سی دیر میں بُجھ جائیں گے سب مہر و مہتاب
یہ دعویٰ کیا، کہ ہر تنویر رہنے کے لیے ہے
ذرا سی دیر میں دُھندلا کے رہ جائے گا ہر نقش
گُماں یہ تھا، کہ ہر تصویر رہنے کے لیے ہے
نہ میری آگ کی شعلگی باقی رہے گی
نہ میری خاک کی تاثیر رہنے کے لیے ہے
نہ یہ آب و ہوا ہے شہرِ جسم و جاں دوامی
نہ میرے درد کی جاگیر رہنے کے یے ہے
نہ اقلیمِ ہُنر میں عظمتِ غالبؔ سلامت
نہ اعجازِ کلامِ میرؔ رہنے کے لیے ہے
کہیں محفوظ ہے لوحِ فنا پر ایک تحریر
بالآخر اِک وہی تحریر رہنے کے لیے ہے

افتخار عارف