جب بھی دیکھا مرے کردار پہ دھبا کوئی

جب بھی دیکھا مِرے کردار پہ دھبّا کوئی

دیر تک بیٹھ کے تنہائی میں رویا کوئی

لوگ ماضی کا بھی اندازہ لگا لیتے ہیں

مجھ کو تو یاد نہیں کل کا بھی قصہ کوئی

بے سبب آنکھ میں آنسو نہیں آیا کرتے

آپ سے ہو گا یقیناً مِرا رِشتہ کوئی

یاد آنے لگا ایک دوست کا برتاؤ مجھے

ٹُوٹ کر گر پڑا جب شاخ سے پتّہ کوئی

بعد میں ساتھ نِبھانے کی قسم کھا لینا

دیکھ لو جلتا ہوا پہلے پتنگا کوئی

اس کو کچھ دیر سُنا لیتا ہوں رودادِ سفر

راہ میں جب کبھی مِل جاتا ہے اپنا کوئی

کیسے سمجھے گا بِچھڑنا وہ کسی کا راناؔ

ٹُوٹتے دیکھا نہیں جس نے ستارہ کوئی

منور رانا