بجھا ہے دل تو غم یار اب کہاں تو بھی

بجھا ہے دل تو غمِ یار اب کہاں تُو بھی

بسانِ نقش بہ دیوار اب کہاں تو بھی

بجا کہ چشمِ طلب بھی ہوئی تہی کیسہ

مگر ہے رونقِ بازار اب کہاں تو بھی

ہمیں بھی کارِ جہاں لے گیا ہے دور بہت

رہا ہے درپئے آزار اب کہاں تو بھی

ہزار صورتیں آنکھوں میں پِھرتی رہتی ہیں

مِری نگاہ میں ہر بار اب کہاں تو بھی

اسی کو وعدہ فراموش کیوں کہیں اے دل

رہا ہے صاحبِ کردار اب کہاں تو بھی

مِری غزل میں کوئی اور کیسے در آئے

سِتم تو یہ ہے کہ اے یار، اب کہاں تو بھی

جو تجھ سے پیار کرے تیری لغزشوں کے سبب

فراز ایسا گنہ گار اب کہاں تو بھی

احمد فراز