جو بات شرط وصال ٹھہری وہی ہے اب وجہ بدگمانی

جو بات شرطِ وصال ٹھہری وہی ہے اب وجہ بد گمانی
ادھر ہے اس بات پر خموشی ادھر ہے پہلی سے بے زبانی
کسی ستارے سے کیا شکایت کہ رات سب کچھ بجھا ہوا تھا
فسردگی لکھ رہی تھی دل پر شکستگی کی نئی کہانی
عجیب آشوبِ وضع داری ہمارے اعصاب پر ہے طاری
لبوں پہ ترتیب خوش کلامی دلوں میں تنظیمِ نوحہ خوانی
ہمارے لہجے میں یہ توازن بڑی صعوبت کے بعد آیا
کئی مزاجوں کے دشت دیکھے کئی رویوں کی خاک چھانی
کسی اداسی کو ڈھونڈ لاؤ،۔ کہ شام اپنے عروج پر ہے
یہ خوشبوؤں کے فریب دیکھو، یہ رنگ ہیں کتنے داستانی
کبھِی یہ سوچا ہے عزؔم تم نے، بہار کس رُت کا نام ہو گا
خزاں سے تم بھی گزر رہے ہو، تو پھر یہ کیسی غلط بیانی

عزم بہزاد