وہ برق ناز گریزاں نہیں تو کچھ بھی نہیں

وہ برقِ ناز گریزاں نہیں تو کچھ بھی نہیں
مگر شریکِ رگِ جاں نہیں تو کچھ بھی نہیں
ہزار، دل ہے تِرا مشرقِ مہ و خورشید
غبارِ منزلِ جاناں نہیں تو کچھ بھی نہیں
سکونِ دل تو کہاں ہے، مگر یہ خوابِ سکوں
نثارِ زُلفِ پریشاں نہیں تو کچھ بھی نہیں
گُزر چکی تِری کشتی ہزار طوفاں سے
ہنوز حسرتِ طوفاں نہیں تو کچھ بھی نہیں
بہارِ گل کدۂ ناز دل کشا ہے، مگر
نسیمِ شوق خِراماں نہیں تو کچھ بھی نہیں
ہے خلوتِ دلِ ویراں ہی منزلِ محبوب
یہ خلوتِ دلِ ویراں نہیں تو کچھ بھی نہیں
ہر ایک سانس ہو آتشکدہ، تو کیا حاصل
گدازِ شعلۂ پِنہاں نہیں تو کچھ بھی نہیں
بغیر عشق ہے رُودادِ زندگی تاریک
یہ لفظ زینتِ عنواں نہیں تو کچھ بھی نہیں
بہت بلند ہے دل کا مقامِ خودداری
مگر شکست کا اِمکاں نہیں تو کچھ بھی نہیں
سکونِ شوق ہو یا اضطرابِ شوق روِشؔ
اگر بہ منزلۂ جاں نہیں تو کچھ بھی نہیں​

روش صدیقی