اک صبح شب آثار ہے اس پار بھی اس پار بھی

اک صبحِ شب آثار ہے اِس پار بھی اُس پار بھی
کچھ روشنی درکار ہے اس پار بھی اس پار بھی
شیشہ بنانا سنگ کو، گویائی دینا رنگ کو
اب یہ ہنر بے کار ہے اس پار بھی اس پار بھی
کلیوں کو چھو کر آئے گی لیکن صبا کیا لائے گی
پابندئ اظہار ہے اس پار بھی اس پار بھی
جو سرکشیدہ لوگ تھے سوتے نہیں اب خوف سے
اک ٹوٹتا پندار ہے اس پار بھی اس پار بھی
نامہرباں ہر رہگزر، شیشہ چٹخ جانے کا ڈر
میرا سفر دشوار ہے اس پار بھی اس پار بھی
چھوٹے بڑے شہکار یہ، افسانوی کردار یہ
کوئی کہانی کار ہے اس پار بھی اس پار بھی
کوئی دہائی دے نہ دے اظہر دکھائی دے نہ دے
اک حبس کی دیوار ہے اس پار بھی اس پار بھی

اظہر ادیب