سانحہ ہم پہ یہ پہلا ہے مری جاں کوئی

سانِحہ ہم پہ یہ پہلا ہے مِری جاں کوئی

ایسے دامن سے ملاتا ہے گریباں کوئی

قیس صاحب کا تو اِس غم میں عجب حال ہوا

اپنے رَستے میں نہ پڑتا ہو بیاباں کوئی

ہم نے اپنے کو بہت دیر سنبھالا ہوتا

آ ہی نکلے اگر آنسو سرِ مژگاں کوئی

یارو! اس دردِ محبت کی دوا بتلاؤ

ڈھونڈ لیں گے غمِ دوراں کا تو درماں کوئی

یک نظر دیکھنا، رم کرنا، ہوا ہو جانا

ان سے چُھوٹی ہے بھلا خُوئے غزالاں کوئی

ہم کسی سمت بھی نکلے ہوں وہیں جا نکلیں

ہم سے بُھولی ہے رہِ کُوچۂ جاناں کوئی

اب تِری یاد میں روئیں گے، نہ حیراں ہوں گے

ان سے پیماں ہے کوئی، دل سے ہے پیماں کوئی

سُونی راتوں میں سرِ بسترِ خوابِ راحت

بیٹھا رہتا ہے کسی بات پہ گِریاں کوئی

بِھیگی شاموں میں کُھلے صحن میں تنہا تنہا

بیقرارانہ ہی دیکھا ہے خراماں کوئی

دوستو دوستو اس شخص کو جا کر سمجھاؤ

اپنے انشاؔ کے سنبھلنے کا بھی ساماں کوئی

یہ بھی ہم لوگوں کی وحشت پہ ہنسا کرتا تھا

آیا اس خانۂ ویراں میں بھی مہماں کوئی

ابن انشا