بے کیف ہیں یہ ساغر و مینا تِرے بغیر

بے کیف ہیں یہ ساغر و مِینا تِرے بغیر
آساں ہوا ہے زہر کا پِینا تِرے بغیر
جچتا نہیں ہے کوئی نِگاہوں میں آج کل
بےعکس ہے یہ دیدۂ بِینا تِرے بغیر
کِن کِن بلندیوں کی تمنا تھی عشق میں
طے ہو سکا نہ ایک بھی زِینہ تِرے بغیر
تُو آشنائے شدّتِ غم ہو تو کچھ کہوں
کِتنا بڑا عذاب ہے جِینا تِرے بغیر
ساحل پہ کتنے دیدہ و دل فرشِ راہ تھے
اُترا نہ پار دل کا سفینہ تِرے بغیر
باقیؔ کسی بھی چیز کا دل پر اثر نہیں
پتھر کا ہو گیا ہے یہ سِینہ تِرے بغیر

باقی احمد پوری