غموں کا بوجھ اٹھائے چل رہی ہے اپنے سر پر زیست

 چلی ہے جانبِ صحرا ہوئی ہے گھر سے بے گھر زیست

ذرا معلوم کیجے ہو گئی ہے کیا قلندر زیست

یہ سچ ہے بلبلہ ہے آپ کا اس کی نہیں وقعت

کرو محسوس تو خود میں ہے بے شک اک سمندر زیست

تعاقب میں ہوں تیرے آج تک، تو مل نہیں پائی

تمنا ہے مری عرصے سے دیکھوں تجھ کو چھو کر زیست

خدا مشکل کرے آساں، وہ مر جاتا تو اچھا تھا

ملی ہے زیست لیکن موت سے بھی ہے یہ بد تر زیست

بڑھائے تو بڑھائے کس طرح رفتار وہ اپنی

غموں کا بوجھ اُٹھائے چل رہی ہے اپنے سر پر زیست

کہ جس سے دل تڑپ اُٹھے لہو کھولے ہوں آنکھیں نم

دکھائے گی ہمیں کب تک بتا تو ایسے منظر زیست

بنا طاعت گزاری، غرق تھی گہرے اندھیروں میں

خمار اذکار سے ہونے لگی ہے اب منور زیست

          

ریاض احمد خمار