آسودگئ شوق کا ساماں نہ کر سکے
جلوے مِری نگاہ پہ احساں نہ کر سکے
تم نے مسرتوں کے خزانے لُٹا دیے
لیکن علاجِ تنگئ داماں نہ کر سکے
آنکھوں سے ٹُوٹتے رہے تارے تمام رات
شائستۂ نشاطِ ملامت کہاں تھے ہم
اچھا ہُوا کہ چاک گریباں نہ کر سکے
اِک والہانہ شان سے بڑھتے چلے گئے
ہم امتیازِ ساحل و طوفاں نہ کر سکے
ہم جانِ رنگ و بو ہیں گلستاں ہمِیں سے ہے
یہ اور بات خود کو نمایاں نہ کر سکے
کچھ اس طرح گزر گیا طوفانِ رنگ و بُو
غُنچے بہار سے کوئی پیماں نہ کر سکے
ہر صبح جاگتا ہوں نئی آرزو کے ساتھ
غم مجھ کو زندگی سے گریزاں نہ کر سکے
قابلؔ فراقِ دوست میں دل بُجھ کے رہ گیا
جینے کے حوصلے بھی فروزاں نہ کر سکے
قابل اجمیری
No comments:
Post a Comment