بچھڑے ہوئے یاروں کی صدا کیوں نہیں آتی

بچھڑے ہوئے یاروں کی صدا کیوں نہیں آتی

اب روزنِ زِنداں سے ہَوا کیوں نہیں آتی

تُو اب بھی سلامت ہے سفر میں تو مسافر

تیرے لیے ہونٹوں پے دعا کیوں نہیں آتی

پتھر ہو تو کیوں خوفِ شبِ غم سے ہو لرزاں

انسان ہو تو جینے کی ادا کیوں نہیں آتی

اِک پیڑ کے سائے سے ہَوا پُوچھ رہی ہے

اب دشت میں مخلوقِ خدا کیوں نہیں آتی

چہروں پہ وہ سرسوں کی دھنک کیا ہوئی یارو

ہاتھوں سے وہ خُوشبوئے حِنا کیوں نہیں آتی

بستی کے سبھی لوگ سلامت ہیں تو محسنؔ

آواز کوئی اپنے سوا کیوں نہیں آتی

محسن نقوی