آج دریچے میں وہ آنا بھول گیا

آج دریچے میں وہ آنا بھول گیا

میں بھی اپنا دِیا جلانا بھول گیا

آج مجھے بھی اس کی یاد نہیں آئی

وہ بھی میرے خواب میں آنا بھول گیا

بیلیں دیواروں سے لپٹنا بھول گئیں

موسم بھی اپنا پھول کھلانا بھول گیا

چلتے چلتے میں اس کو گھر لے آیا

وہ بھی مجھ سے اپنا ہاتھ چھڑانا بھول گیا

خط لکھا ہے، پر خط کے کونے پر

وہ ہونٹوں سے پھول بنانا بھول گیا

روٹھ کے اک بستر پہ دونوں بیٹھے رہے

میں اس کو، وہ مجھ کو منانا بھول گیا

دھوپ چڑھے تک دونوں گھر میں سوئے رہے

میں اس کو، وہ مجھے جگانا بھول گیا

نذیر قیصر