میں گھر میں ہوں مگر یہ گھر قفس میں آ گیا ہے

میں گھر میں ہوں، مگر یہ گھر قفس میں آ گیا ہے

نگر سارا کسی دشمن کے بس میں آ گیا ہے

میں برگد ہوں، مگر یہ دھوپ مجھ کو چاٹ لے گی

مِرا سایہ تو اِس کی دسترس میں آ گیا ہے

میں تیرے شہر کو اب چھوڑ دینا چاہتا ہوں

یہاں تو پیار کرنا بھی ہوس میں آ گیا ہے

وہی ہجرت میں ہجرت ہو رہی ہے پہلے جیسی

وہی پچھلا برس، اگلے برس میں آ گیا ہے

کوئی رویا تھا شاخِ طاق کے سائے میں فیصل

لہو کا رنگ، انگوروں کے رس میں آ گیا ہے

فیصل عجمی