تجھ کو دریا دلی کی قسم ساقیا مستقل طور پہ دور چلتا رہے

تجھ کو دریا دلی کی قسم ساقیا 

مستقل طور پہ دور چلتا رہے 

رونق مۓ کدہ یونہی بڑھتی رہے 

ایک گرتا رہے، اک سنبھلتا رہے

صرف شبنم ہی شان گلستاں نہیں 

شعلہ و گل کا بھی دور بھی چلتا رہے

اشک بھی چشم پُرنم سے بہتے رہیں

اور دل سے دھواں بھی نکلتا رہے

تیرے چہرے پہ یہ زلف بکھری ہوئی

نیند کی گود میں صبح نکھری ہوئی

اور اس پر ستم ، یہ ادائیں تیری 

دل ہے آخر کہاں تک سنبھلتا رہے

تیرے قبضے میں ہے یہ نظام جہاں

تو جو چاہے تو صحرا بنے گلستاں

ہر نظر پر تیری پھول کھلتے رہیں

ہر اشارے پہ موسم بدلتا رہے

صبا افغانی