نہ کوئی خواب ہمارے ہیں نہ تعبیریں ہیں

نہ کوئی خواب ہمارے ہیں نہ تعبیریں ہیں 

 ہم تو پانی پہ بنائی ہوئی تصویریں ہیں 

 کیا خبر کب کسی انسان پہ چھت آن گرے

 قریۂ سنگ ہے اور کانچ کی تعمیریں ہیں 

 لُٹ گئے مفت میں دونوں، تری دولت، مِرا دل

 اے سخی! تیری مِری ایک سی تقدیریں ہیں 

 ہم جو ناخواندہ نہیں ہیں تو چلو آؤ پڑھیں 

وہ جو دیوار پہ لِکھی ہوئی تحریریں ہیں 

 ہو نہ ہو یہ کوئی سچ بولنے والا ہے قتیلؔ

 جس کے ہاتھوں میں قلم پاؤں میں زنجیریں ہیں

قتیل شفائی