دشت جلتے ہوئے جنگل سے کہیں اچھا ہے

دشت جلتے ہوئے جنگل سے کہیں اچھا ہے
ہاں مِرا آج مِرے کل سے کہیں اچھا ہے
اِکتفا کیجے کنویں پر کہ یہ کھارا ہی سہی
بے یقینی بھرے بادل سے کہیں اچھا ہے
کنجِ ہجراں میں ہلاہل ہی سہی سناٹا
تِری آواز کی دلدل سے کہیں اچھا ہے
یہ مِرا ٹاٹ یہ چوپال کا تختِ انصاف
مخملیں مسندِ مقتل سے کہیں اچھا ہے
تجھ ادھورے میں نکل آئئ مِری گنجائش
تُو مجھے حسنِ مکمل سے کہیں اچھا ہے
زندگی بخش ہیں یاں پیڑ، پرندے، پانی
باغ چھوٹا ہی سہی تھل سے کہیں اچھا ہے
پیاس بھڑکا کے بجھاتا بھی ہے آخر کسی دن
آب پارہ تِرے آنچل سے کہیں اچھا ہے
رکھ ابھی رکھ مِرے دل پر کہ ترا پائے فنا
دستِ امیدِ مسلسل سے کہیں اچھا ہے
روز افزوں ہے جو تنہائئ سے رشتہ شاہدؔ
یار کے ربطِ معطل سے کہیں اچھا ہے

شاہد ذکی