پھول کا ذکر ہے تمہید گلستاں مدد دے

پھول کا ذکر ہے تمہیدِ گلستاں مدد دے
رنگِ رخسار ہے تصویرِ بہاراں مدد دے
پھر کوئی نکہتِ آوارہ مجھے ڈھونڈ نہ لے
ریگِ صحرا و کفِ دستِ بیاباں مد دے
دن کا سورج بھی اجالوں کے سفر سے ہارا
شب کا سناٹا ہے اے نعرۂ مستاں مد دے
سب تِری زد پہ ہیں اس طرح سبھی بیٹھے ہیں
ناوکِ انداز ہو اے دیدۂ جاناں مدد دے
ساحلی ریت سمندر سے لہو تھا مجھ میں
سر پھِری موجِ ہوا شورشِ طوفاں مدد دے
آخری ساعتِ مئے خانۂ شب آئی ہے
دستِ مہتاب پئے لغزشِ مستاں مدد دے
لوگ بیٹھے ہیں مسائل سے گھری ہیں میزیں
قتل گاہوں میں ہیں افکارِ پریشاں مدد دے
ورقِ سادہ سی لگتی ہے ابھی تک دنیا
کوئی قصہ ہو رقم، خامۂ امکاں مد دے

زبیر رضوی