قبر میں اترتے ہی

کتبہ

قبر میں اترتے ہی

میں آرام سے دراز ہو گیا

اور سوچا

یہاں مجھے

کوئی خلل نہیں پہنچاۓ گا

یہ دو گز زمین

میری

اور صرف میری ملکیت ہے

اور میں مزے سے مٹی میں گھلتا ملتا رہا

وقت کا احساس یہاں آ کر ختم ہو گیا

میں مطمئن تھا

لیکن بہت جلد

یہ اطمینان بھی مجھ سے چھین لیا گیا

ہوا یوں

کہ ابھی میں

پوری طرح مٹی بھی نہ ہوا تھا

کہ اور شخص

میری قبر میں گھس آیا

اور اب

میری قبر پر

کسی اور کا کتبہ نصب ہے

محمد علوی