روتے روتے جو کبھی حرفِ دعا لکھتے ہیں
ہم وہ مجبور کہ لوگوں کو خدا لکھتے ہیں
بھول جاتے ہیں وفاؤں کے پرانے رشتے
ہم وہ خودسر ہیں، محبت کو انا لکھتے ہیں
ہیر رانجھے کی یا سسی کی کہانی سن لو
لکھنے والے تو اسے اب بھی سزا لکھتے ہیں
جن کو آتا ہے سلیقے سے محبت کرنا
ان کو لکھتے ہیں تو پتھر کے خدا لکھتے ہیں
اس محبت سے ہمیں اب تو خدا دور کرے
لوگ قاتل کو اب دستِ حنا لکھتے ہیں
کر کے آتا ہے جو روضے کی زیارت راشد
ہم مدینے کی اسے آب و ہوا لکھتے ہیں
راشد ترین
No comments:
Post a Comment